Colectivos e veciños reclaman «unha educación de calidade na montaña» e para iso promoven unha andaina, charlas, artesanía e música
26 ago 2019 . Actualizado a las 12:18 h.O próximo sábado 31 de agosto celebrarse en Cervantes a sétima «Festa da Involución Educativa, por unha educación de calidade na montaña», organizada pola Anpa do CPI de Cervantes e o Colectivo Patrimonio dos Ancares, coa colaboración da Deputación Provincial de Lugo, o CDR Ancares e o Concello de Cervantes.
Un ano máis, a celebración desta xornada lúdico-reivindicativa, sinalan os organizadores, é para reclamar unha educación de calidade nos concellos que forman parte da montaña luguesa, cada volta máis despoboada. «Para decatarse da brutal caída demográfica, nos últimos vintecinco anos a merma da poboación ronda o 30 %». Por poñer un exemplo, o municipio de Cervantes, sinalan os convocantes fa festa, chegou a contar con trinta escolas, a última a de Doiras que pechou hai poucos anos. Na actualidade só funciona o CPI de San Román, que acolle a pouco máis de 30 nenos e nenas.
As actividades comezan ás 10 da mañá no Mesón de Catroventos, cunha andaina polas mámoas de Savane e Pena dos Mouros ata o castro de Santa María. Ás 14 horas, xantar no castro (os asistentes deberán levar a comida). Ás 16 horas, demostración de olería. Ás 17 horas, charla sobre «A pegada romana no concello de Cervantes». E ás 18 horas, actuacións musicais coas intervencións de Mini, Os Xardois e Son de Cores.