Alma Selene: «Sinto amor poético polos autores que recito»

A soprano, actriz e escritora Alma Selene, afincada en Lugo, e o guitarrista e compositor José Manuel Brea, ofrecen o venres 15 ás 19.30 horas un recital poético-musical en liña, co gallo da celebración do Día das Letras Galegas. O concerto, Amores poéticos, poderá seguirse desde a UNED de Lugo (http://extension.uned.es/actividad/21931&codigo=AMORE).

-Como xurdiu a idea deste recital?

-Cando cheguei a Galicia, aló por 1991, a miña paixón pola literatura levoume a ler a oito poetas, escritores e dramaturgos en lingua galega que deixaron profunda pegada en min. Tanto é así que eles serían os meus primeiros amores poéticos, os que marcarían a miña traxectoria literaria; os meus oito alicerces da beleza dunha lingua e dunha terra que se quedou en min e eu nela.

-Por que se chama «Amores poéticos» o recital?

-Porque descubrilos para min foi todo un frechazo. Sinto verdadeiro amor poético por cada un dos poetas aos que canto e recito neste concerto.

-Que oito escritores forman parte desta viaxe musical?

-Nesta viaxe marabillosa estarei acompañada polo músico José Manuel Brea, e xuntos saímos ao encontro da profunda Rosalía de Castro, a elegancia sinxela de Manuel María, a comedia do teatro de Castelao, a lírica galaico-portuguesa de Álvaro Cunqueiro, a espiritualidade de Xosé María Díaz Castro, a poética social de Celso Emilio Ferreiro, a poesía espida e sen máscaras desgarrada pola dor de Lois Pereiro e a evocadora madurez autopoética de amor, soidade e nostalxia de Pilar Pallarés. Cada poema, cada texto, cada canción é para nós fonte inspiradora de creatividade. Para iso, profundamos nas súas letras interiorizando en cada unha das palabras que integran os seus poemas, despois a música fainos fluír de maneira natural nesta gran viaxe musical e poética.

-Onde se desenvolverá?

-Este recital estaba previsto e concertado coa UNED de Lugo antes da crise sanitaria na que nos vemos inmersos, precisamente como homenaxe a cada un destes poetas para celebración do Día das Letras Galegas. A data acordada era o 15 de maio. Por motivos obvios, non puido ser así, pero como esta data de celebración parecíanos moi importante para Galicia e non queriamos suspendelo, optamos por ofrecelo igualmente, pero en liña, nas redes da UNED de Lugo, para que así o público poida gozalo desde as súas casas.

PROGRAMA

Rosalía de Castro

· Airiños, airiños aires (Cantares Gallegos)

· Adiós ríos, adiós fontes

· Unha vez tiven un cravo (Follas Novas)

· Negra sombra

Manuel María

· Versos do outono (Mar Maior)

· Balada íntima (Libro das baladas)

· Balada das vellas sombras

Castelao

· Lela (Os vellos non deben namorarse)

Álvaro Cunqueiro

· Quen poidera namorala (Cantiga nova que se chama Riveira)

Xosé María Díaz Castro

· Esmeralda (Nimbos)

· Coma unha espada

· Cortina

Celso Emilio Ferreiro

· Credo (Longa noite de pedra)

Lois Pereiro

· Declaración (Poesía última de amor e enfermidade)

Pilar Pallarés

· Ser poeta (Entre lusco e fusco)

· Dime, amor

· Terra de Deus

· A tarde, cun can e un livro (Livro das devoracións)

· Dormir-me na noite do teu pelo

· Foi a igualdade ou foi a diferenza? (Leopardo son)

---

---

---