Coma todos os veráns, estanse a celebrar os campionatos de España de xadrez en categorías xuvenís. No recentemente rematado campionato sub-16 o podium tinguiuse de branco e azul, ao ocupar os representantes galegos a metade do podium. Se isto xa nos emocionou a todas as persoas que tivemos ocasión de asistir e seguir o torneo, houbo un momento que nos arrincou bágoas a moitos dos presentes: cando Xulio del Prado, campión de España sub-16, pasou o seu brazo polo ombreiro do sub-campión, Diego Cacheiro. Os dous galegos, os dous amigos, compartiron a semana e a mesa do xantar, momentos de xogo fóra dos taboleiros oficiais e tamén o podium. Con eles estaba, como sub-campioa feminina, a tamén galega Paula Suárez.
Case 20 rapaces e rapazas galegas viaxaron a Salobreña para participar nos campionatos. Máis alá dos bos resultados deportivos, todos levarán a lembranza dunha semana chea de experiencias que nos fixo sentir o valor do deporte xuvenil: as partidas de xadrez, mais tamén os xogos compartidos na piscina, o futbolín, as partidas amistosas xogadas nos taboleiros despois do campionato. Porque moitos deles, despois de estar 8 horas nos taboleiros oficiais, seguían xogando ao final do día por puro amor ao xogo.
Esta semana celébrase o campionato sub-18 e alí temos tamén 16 representantes galegos. A través de internet poderemos seguir na distancia as partidas das primeiras 45 mesas do campionato coa esperanza de que novamente o podium se tinga de branco e azul. Sen dúbida, os que xa marcharon seguirán as partidas dos seus compañeiros e amigos, botando de menos a emoción do torneo e a convivencia dunha semana máxica. Algúns dos que competiron a semana pasada seguen alí, xogando tamén en sub-18, entre eles Xulio del Prado. Moita sorte a eles neste verán que tamén leva as cores do branco e o negro.