Os cabalos foron protagonistas no Monte do Carballo, onde tamén o día axudou a gozar dun variado programa
28 jul 2024 . Actualizado a las 22:26 h.A Rapa das Bestas de Carballo (Friol), que ten como obxectivo recuperar o Cabalo de Pura Raza Galega, deixou un ano máis o listón ben alto. As bestas convertéronse en protagonistas no Monte do Carballo e o espectáculo da pelexa corpo a corpo entre aloitadores e cabalos reuniu a centos de espectadores que se achegaron a gozar da xornada, na que había programadas tamén numerosas actividades para todos os públicos. Na Rapa das Bestas primaron, coma sempre, o bo trato aos animais e aproveitaron para realizar os tratamentos sanitarios.
A xornada deu comezo ás nove da mañá, cando se reuniron os cabaleiros no monte para conducir as bestas cara o curro. Ás doce da mañá tivo lugar o acto central, a rapa, na que se aproveitou para aplicar o programa sanitario e, posteriormente, á unha, fíxose un recoñecemento aos aloitadores e cabaleiros participantes no acurramento. Igual que en toda festa galega, non faltou a gastronomía, e os asistentes que así o desexaron puideron quedar a comer no servizo de bar e carpa, no que había dispoñible un menú por 27 euros.
Carreiras de galope
Coma en anos anteriores, o programa incluíu as tradicionais carreiras de galope entre cabalos cruzados e puros. Para participar esixiron carta demostrativa e uso de casco obrigatorio. Houbo tamén unha xincana popular e tanto as carreiras coma a xincana contaron cunha entrega de premios en metálico, dende os 20 ata os 100 euros, e tamén trofeos.