As 19 asociacións de recreación histórica votaron por unanimidade estas datas para celebrar a vixésimo cuarta edición da festa de recreación histórica lucense
19 dic 2024 . Actualizado a las 17:01 h.O goberno de Lugo anunciou que o Arde Lucus 2025 terá lugar do 12 ao 15 de xuño, tras unha reunión coas 19 asociacións de recreación histórica que votaron por unanimidade as datas. O executivo de Paula Alvarellos asegurou, así mesmo, que buscan dotar ao evento de máis calidade na parte de divulgación histórica e continuar co labor divulgativo do pasado histórico da cidade.
O concelleiro de Xuventude, Jorge Bustos, agradeceu a implicación das agrupacións, así como o papel das compañías de teatro, que enriquecen a programación da festa. «O esforzo destes colectivos é esencial para consolidar o éxito do Arde Lucus e seguir avanzando cara a unha recreación histórica máis fiel e unha maior divulgación do noso pasado romano e castrexo», asegurou Bustos.
Na reunión tamén se fixo balance da pasada edición do Arde Lucus, que acadou unha ocupación hoteleira do 100 % e unha afluencia máxima, consolidando a cita como un dos eventos máis destacados do calendario cultural galego. Bustos destacou, neste sentido, que «a afluencia non pode ser maior, polo que agora centramos os nosos esforzos en mellorar a calidade da programación e en facer do Arde Lucus unha experiencia inesquecible».
Cabe engadir que esta festividade, que todos os anos converte Lugo nunha viaxe ao pasado, conta co traballo de 19 asociacións de recreación histórica, fundamentais para o seu éxito e que votaron tamén, como sinalamos anteriormente, por esta data. As agrupacións son Ara Roma, Asamblearias Lucus Augusti, Caetra Lucensium, Civitas Lucensis, Clan de Breogán, Cohors III Lucensium, Garda Pretoriana, Kertix, Lucus Equites, Lucus Icenas Miliatore, Lugdunum, Mercenarios Galaicos, Pax Romana, Salesiani Luci Augusti, Senatus Lucus Augusti, Terra Copora, Tir Na n'Og, Trebas Galaicas e Vestales Lucus Augusti.