O concelleiro do BNG de Vilalba eloxia a postura de Fraga ante o galego: «Teño que dicilo»
LUGO
O concelleiro Tino Alvite salienta que o político vilalbés tivo na Xunta «máis sensibilidade ca os seus sucesores» en cuestións lingüística
29 may 2025 . Actualizado a las 21:21 h.Manuel Fraga estivo presente no pleno que a corporación de Vilalba celebrou este xoves. O concelleiro do BNG lembrou a actitude de quen presidiu a Xunta de 1990 ao 2005, e recoñeceulle unha postura de respecto ao galego que non viu nos seus sucesores: «Teño que dicilo», afirmou Alvite sobre as actitudes de Fraga.
O representante nacionalista obtivo o apoio do PSOE e de Vilalba Aberta á súa proposta de máis apoio ao galego; atacou o «vergoñento» contexto de diminución de horas de emprego do galego no ensino, e concluíu que Fraga amosou «máis sensibilidade» ca os seus sucesores no emprego do galego.
O PP, que votou en contra, lembrou que estaba en marcha unha iniciativa da Xunta con varias medidas (entre elas, o uso da TVG como canle que favoreza unha maior circulación social do idioma), e criticou o fondo da plataforma Queremos Galego como un movemento «satélite» do BNG. O concelleiro José María García-Leira Boado propuxo que se votasen os puntos da moción por separado ou que se retirase a adhesión a Queremos Galego como unha maneira de acadar unanimidade.
Non conseguiu ese obxectivo, e si, porén, tivo que escoitar críticas. O socialista Luis Fernández salientou que o galego, coma o catalán ou o vasco, son linguas cuxa protección recoñece a Constitución, e criticou a connivencia do PP cos "cortesáns madrileños" pra desprezar outros idiomas.
García-Leira Boado cuestionou que houbese unha campaña organizada contra o galego. O debate acabou chegando á polémica pola inclusión do galego, do euskera e do catalán como linguas de emprego recoñecido nas institucións da Unión Europea, e García-Leira explicou que o PP non se opoñía a iso, pero si a "darlle a razón a Puigdemont". Aínda tivo tempo de botarlle en cara ao PSOE a súa relación co Bloque, que considerou de total subordinación: "Seguiredes perdendo as eleccións como non cambiedes a política", dixo.
«A min o que me interesa é o galego», replicou Luis Fernández. A alcaldesa, Marta Rouco, interviu para lembrar os tempos nos que José María Aznar, necesitado do apoio de CiU pra chegar á presidencia do goberno e pra manterse despois no poder, confesaba falar catalán na intimidade.