![Presentación da Feira do Butelo da Fonsagrada](https://img.lavdg.com/sc/mZoPbUDFSOikx1mFF-D0NHJZ3IM=/480x/2024/01/31/00121706723101380435859/Foto/L_20240131_141056000.jpg)
O Concello renderá tributo a 27 produtores e empresas que comezaron hai case tres décadas a comercializar este embutido da montaña de Lugo
31 ene 2024 . Actualizado a las 21:01 h.A Deputación de Lugo acolleu onte a presentación da 27 edición da Feira do Butelo da Fonsagrada. Unha cita gastronómica que se celebrará este fin de semana, os días 3 e 4 de febreiro, neste concello da montaña lucense, e que conta cunha achega da institución provincial de 20.000 euros.
A deputada de Réxime Interior, Promoción do Territorio e Turismo, Pilar García Porto; e o alcalde de A Fonsagrada e deputado de Medio Ambiente, Carlos López, presentaron esta nova edición da feira no Pazo de San Marcos.
«O butelo é o verdadeiro rei da Montaña», sinalaba García Porto citando ao humorista Forges, explicando que este produto exemplifica o mellor da tradición culinaria da provincia, porque é o resultado do esforzo conxunto dos gandeiros, as empresas cárnicas, os distribuidores e a hostalería.
Festa de Interese Turístico de Galicia
Destacou tamén a deputada a importancia de que esta cita conte coa certificación de Interese Turístico de Galicia e polo que supón ao recoñecemento do traballo do tecido produtivo da provincia: «Eles son os que verdadeiramente manteñen a actividade económica no rural e aportan unha importante porcentaxe ao PIB da provincia, ademais de asentar poboación coa súa actividade».
García Porto resaltou a importancia da gastronomía na provincia de Lugo e o seu eco na oferta turística do territorio pola «autenticidade e a calidade dos nosos sabores». Nese sentido lembrou a campaña da institución provincial deste ano en Fitur, titulada «Saborea a provincia de Lugo».
Butelo de Ouro
A 27 Feira do Butelo recoñecerá o traballo aos 27 produtores e empresas que comezaron a comercializar o embutido. O alcalde informou que se trata da Carnicería Silmer, Xosé do Cámping, Facenda Farruquiño, Embutidos Riopedre Méndez, Tita de Vilarello, Embutidos Buenavista, Cárnicas Castelao S.L, e Belén da carnicería Día.
As persoas que se acheguen a esta feira multitudinaria poderán visitar algún dos máis de 70 postos de artesanía e gastronomía, onde se poderán catar produtos como o butelo ou o mel, así como catro postos das industrias cárnicas locais.