Xa leva 200 exemplares desde 2013
21 ene 2018 . Actualizado a las 19:01 h.A coñecida como supercocha de Portomarín volveu estar de parto esta fin de semana. Nesta ocasión pariu un total de 22 leitóns, segundo contou o veterinario José Luis Vázquez Gómez, que está á fronte da explotación na que se atopa o prolífico animal.
As marcas de fertilidade deste exemplar seguen a sorprender no sector, xa que non é habitual que os animais con maior produción superen os vinte exemplares por parto.
O desta fin de semana foi o noveno parto desta femia, que naceu en novembro do 2013 e que leva xa un total de 200 leitóns, un rexistro do que non hai moitas referencias noutras explotacións.
No primeiro parto a supercocha, como así a bautizaron na granxa, tivo 11 crías, pero logo, nos sucesivos, foi aumentando. Chegou a parir 30 no cuarto, segundo lembrou o dono.
De novo, algúns dos exemplares que naceron desta vez van ter que ser mantidos por outras porcas da explotación, porque súa nai non é capaz de poder atendelos a todos. Na granxa hai unhas cincocentas reprodutoras que poden cumprir o papel de atender á prole sobrante da prolífica porca, que é un cruce de das razas Prietrain e Landrace, segundo lembrou o veterinario.