Iniciouse a campaña de vacinación contra a gripe coa recomendación de unila a unha terceira dose da anticovid, no caso de ter máis de 70 anos e ter recibido as dúas anteriores. Dispúxenme a recibir a miña dose de ambas, aínda que creo que mellor que esa terceira dose sería vacinar aos non vacinados de todo o mundo, antes de que unha mutación do virus neses países faga inútil as vacinas actuais.
En Madrid, cada institución pon as súas propias normas: Muface (Asisa) non empezou a dar citas ata o día 4 de novembro (tiñan unha «incidencia no sistema») e para a dobre vacinación dáas a partir do 29 de decembro. Probei sorte cun ambulatorio da Seguridade Social. Ás doce do mediodía daba citas para esa mesma tarde… aos seus afiliados: prohibición absoluta de vacinar a outras persoas.
Chamei aos 17 centros de saúde comunitarios. Cada un deles dispón de dous teléfonos de atención. Chamei a todos, e en todos soaba a mesma musiquiña e ninguén colleu o teléfono. Polos comentarios na Internet comprobei que iso era o habitual.
Esta mañá fun ao centro de saúde máis próximo. Alí, se queres a dobre vacinación danche cita, pero se só queres a terceira dose anticovid, non. Tes que ir ao Hospital Zendal. Ou sexa, que a campaña é antigripal, e a terceira dose sóltancha de paso. Confío en que conste nos seus computadores a que cada un recibimos previamente, porque iso non o preguntan.
Supoño que cada comunidade tamén terá as súas propias normas. Creo que sería mellor unificar criterios e unir forzas contra a pandemia, pero parece que a unidade inspira desconfianza, soa a fascista, din.