Desde que estou por terras de Colombia e Ecuador nin unha soa vez oín nos discursos dos políticos a denominación Hispanoamérica para referirse a esta parte do continente, nin tampouco nas noticia da canle internacional de España.
Roma invadiu a península Ibérica que pasou a chamarse Hispania e impuxo a súa lingua, o latín, e a súa relixión cristiá. Despois viñeron os árabes e Hispania pasou a ser Al Andalus. Pero Castela, un pequeno condado do norte, comezou a estenderse, converteuse en reino (século XI) e iniciou unha reconquista, que culminou coa conquista do reino nazarí de Granada polos Reis Católicos en 1492.
Navegando cara ao oeste, Colón chegou á illa de Guanahaní crendo chegar á India. Foi Américo Vespucio quen se decatou de que se trataba dun continente novo, e a partir de aí recibiu o nome de América. O reino de Castela anexionouse aquelas terras e tras eles chegaron Portugal, Inglaterra, Francia, Holanda, Rusia, Suecia, entre outras potencias europeas, que competiron pola conquista e colonización do continente.
Todos espoliaron e destruíron, pero os españois mesturáronse cos pobos invadidos. As Leis de Indias favoreceron a mestizaxe. Os españois construíron cidades e fundaron colexios maiores e Universidades. Os centros históricos de moitas cidades americanas son coloniais, é dicir, construídos durante a dominación española.
Os españois levaron a América a súa relixión e a súa lingua, o castelán , que era un latín transformado polos substratos lingüísticos primitivos e pola influencia do árabe.
Esa latinidade, que nacións do centro e sur de América están a converter en sinais de identidade, chegoulles a través de España. Por tanto é absurdo que pretendan eliminar a denominación Hispanoamérica. ¡Pero coa política topamos, Sancho!