Os meus amigos de España envíanme mensaxes dicindo «non saias, non sexas imprudente, xa ves o que lle pasou ao fiscal que investigaba aos narcos»...
Cando me conecto ás noticias de España sae sempre a portavoz do Goberno cantando os encomios da xestión de Pedro Sánchez dun modo que aburriría ao santo Job, así que corto a comunicación, pero pódolles dar a miña versión sobre o perigo da vida aquí neste momento.
A morte do fiscal foi un duro golpe para visión optimista de Daniel Noboa da súa loita contra o narcotráfico. Pero pódese dicir que o fiscal morreu por exceso de confianza ou por un deses sorprendentes fallos da vida ecuatoriana. Alguén que está a investigar aos narcotraficantes, ten que viaxar nun coche blindado e levar escolta. E non foi así.
Perigo existe, sen dúbida. No meu barrio hai xente que entra e sae do banco da esquina, que pasea ao can, que leva bolsas da compra, que vai a algunha xestión; o que non hai é xente paseando ao sol tranquilamente. Por certo, levan tres días anunciando choivas importantes, pero non cae nin unha pinga e loce o sol. O servizo meteorolóxico é un dos fallos da vida aquí.
Outro fallo é que non atopas cousas de uso común en España, por exemplo, un cepillo de dentes eléctrico. Cando o pido míranme aguantando a risa, coma se pedise un orinal eléctrico. E tampouco atopo un calzador. Supoño que o terán en zapaterías especializadas, pero nos supermercados onde venden zapatillas deportivas non teñen un calzador nin sequera para probarchas. En fin, queridos amigos/as e lectores de España, grazas polo voso interese. O meu fillo maior vive aquí e non me deixa ser imprudente. Seguireivos contando.