Alba García, trompetista que se forma na escola Reina Sofía: «Paga a pena o traballo duro para conseguir unha carreira profesional»

Confesa Alba García (Ourense, 2003) que se puidese falar coa Alba cativa ten moi claro o que lle diría: «Que non deixase de coller a trompeta e se centrase na súa carreira musical porque paga a pena. Vives épocas moi boas, tamén algunhas malas, pero o esforzo compensa e cumprir ese soño é o mellor que che pode pasar».

Mentres goza das vacacións de Nadal —este é o seu terceiro curso na Escola Superior de Música Reina Sofía de Madrid— recoñece que segue a lembrar a experiencia do concerto que ofreceu o pasado día 19 no Otero Pedrayo xunto ao pianista Luis Arias como algo moi fermoso e desexado. A actividade formaba parte do ciclo Centenario Telefónica, un proxecto que promove actuacións en espazos monumentais para celebrar os cen anos da empresa. Entre outros, houbo concertos na mesquita de Córdoba, a catedral vella de Salamanca e a praza do Concello de Toledo. «Tiña moitas gañas de tocar en casa e facelo cun recital deste tipo. Foi moi especial e escollemos con moito cariño o repertorio para o concerto de Ourense. Era na miña cidade e ían estar a familia e os amigos no público, daquela tiña que ser algo diferente, unha actuación para lembrar», recoñece. Ela xa participou noutras dúas experiencias do programa: «Estiven nas actuacións da mesquita de Córdoba e no Auditorio Nacional, aínda que eses concertos foron diferentes porque eran con orquestra».

Paixón temperá

A de Alba García foi unha escolla iniciática. «Cando era pequena meus pais leváronme a unha escola de música. Probei de todo —percusión, guitarra, saxofón, frauta...— e cando me atopei coa trompeta xa non a quixen soltar máis. E dende entón estou encantada», recoñece. Unha relación que se converteu en paixón traballada a base de milleiros de horas de dedicación. Comezou aos seis anos e aos nove entrou no Conservatorio Profesional de Música de Ourense, onde cursou os graos elemental e profesional.

E a seguinte etapa chegou na forma do desexo que sempre quixo ver cumprido. «Quería ir á Escola Superior de Música Reina Sofía e formarme con profesores como Reinhold Frieddrich ou Manuel Bravo. E o soño fíxose realidade, levo tres cursos na mesma con eles e con outros grandes mestres e o primeiro ano fun escollida como a alumna máis sobresaínte da cátedra. De feito o diploma entregoumo a propia raíña Sofía», lembra. Tamén sinala que o percorrido non é doado: «Estamos traballando moi duro, porque a fin de contas te preparas para unha futura carreira profesional, e queda moito camiño por percorrer».

E mentres esa realidade chega o futuro inmediato pasa polos compromisos que veñen co novo ano. Alba Grcía forma parte da Jonde (Joven Orquesta Nacional de España) e coa mesma comezará en xaneiro unha xira de concertos. Tamén con esa formación participará nas citas do proxecto Zarza, unha iniciativa de zarzuela feita por mozos e dirixida a un público novo.

Ten claro a trompetista ourensá cal quere que sexa o seu futuro, e logo de recoñecer que hai grandes orquestras internacionais que poden ser unha interesante experiencia profesional —aínda que sexa de forma temporal— Alba García sinala as súas preferencias: «Aquí temos proxectos moi interesantes e de contrastado prestixio. A Orquesta Nacional de España, a Sinfónica de Galicia ou a de Euskadi serían unha opción marabillosa».

 A alternativa docente

Aínda que nunca valorou dedicarse á docencia admite que pode ser unha opción. «Estiven en setembro en Panamá con outros membros da Jonde impartindo clases a novos músicos. Foi unha experiencia sorprendente que me gustou un montón».

Unha traxectoria que suma becas e premios e un trío para o futuro

Alba García leva recibido un bo número de recoñecementos e apoios á súa carreira. No 2017 gañou o primeiro premio de trompeta Lucio Octavio Magio IX —de Astorga— e entre os anos 2020 e 2023 levou o segundo galardón do décimo primeiro Concurso Valeriano Machí Esparza (Valencia), o segundo na categoría solista e o primeiro en interpretación de música do Mestre Vide (Ourense), levou galardón no Concurso de Jóvenes Intérpretes Ciudad de Zamora e distincións no Internacional de Trompeta José María Ortí Soriano (Valencia). Tamén en Múnich. Ten colaborado con varias orquestras e forma parte da Jonde, Gustav Mahler Jungend Orchester e a Xove Orquestra Sinfónica de Galicia. Recibiu as becas da Jonde e Ferrer Salat.

A trompetista ourensá tamén participa no Trío Fanny Hensel. «É un proxecto que está en fase de creación. Somos tres amigos trompetistas e aínda estamos traballando no repertorio que imos ter para cando comecemos o noso percorrido. Por agora non fixemos ningún concerto, pero chegará o momento».

---

---

---