Critican a eliminación da loita de mecos da praza Maior do programa do entroido ourensán

Tradicionalmente o programa do entroido da capital ourensá comeza coa loita dos mecos, que reúne cada xoves de comadres a centos de nenos na praza Maior. Nesta ocasión, sen embargo, a actividade desapareceu da programación municipal e a celebración será este ano nos patios dos colexios que o organicen. Así o denuncia o PSOE, que lamenta que o alcalde, Gonzalo Pérez Jácome, non dese ningún tipo de explicación ao respecto.

«É unha mágoa que a Concellería de Educación non continúe cun sinal de identidade no que participaban ao redor de 300 nenos cada ano e que ía máis aló da propia actividade ao mergullarse a cativada nos costumes do noso entroido», lamenta a concelleira socialista Cristina Cruz. A representante do PSOE criticou tamén o cartel oficial deste ano, que «non está á altura do que significa o entroido para Ourense».

O grupo socialista rexistrou unha serie de preguntas sobre este asunto e o alcalde contestou explicando que foi un encargo a unha empresa especializada en creacións gráficas (Shinobi) cun custe de 1.500 euros, sen incluír o IVE. Ademais o PSOE preguntou «cales foron as pautas ou a inspiración de dito cartel» e o rexedor facilitou unha resposta que indigna aos socialistas: «Non temos acceso á profundidade das mentes para responder a esta pregunta, nin tampouco temos resonancias magnéticas que nos dean pistas sobre este asunto».

O BNG, sobre a barra

O goberno de Jácome anunciou unha poxa para xestionar unha barra de bebidas en Bispo Cesáreo durante o entroido e as bases, xa publicadas, non convencen ao BNG porque prevén o pago en especie en favor das empresas que organizan as actividades musicais. «Resulta cando menos chamativo», di o voceiro nacionalista, Luís Seara, que esixe máis información.

---

---

---