Un artista ourensán abre con Franco Battiato unha serie sobre a banda sonora da súa vida

A cidade conta cunha nova obra de Mon Devane e a mesma chega anunciando un futuro proxecto por parte do artista. Na rúa Clara Campoamor o muralista creou unha peza na que se pode ver a Franco Battiato. É un traballo que Devane fixo de forma altruísta e será a primeira dunha serie cunha clara compoñente persoal: «Deixoume o muro os da Asociación de Daño Cerebral Adquirido, que está no baixo do edificio, e había meses que tiña pendente facer algo. Cando traballo deste xeito —fixo o proxecto de balde— sempre deixo claro que a única condición que poño é non ter esixencias en canto aos prazos e facelo con temática libre». Desta volta o artista ourensán decidiu que vai crear unha serie coa banda sonora da súa vida: «É certo que fixen xa obras, como as de Ennio Morricone ou Ron Carter, relacionadas coa música pero isto é algo distinto e estará centrado na miña experiencia persoal, nas músicas da miña vida. E comecei con Franco Battiato porque era o que escoitaba os sábados pola mañá na casa cando era neno. Poñíamo miña nai», sinala ao tempo que recoñece unha dobre homenaxe: á banda sonora que o acompañou nestes anos e á súa nai. Devane foi deixando o proxecto pero púxose ao choio hai pouco para que estivese rematado para a ruta que organizaron os guías Guido Guía e Fabio Forino polos espazos de Ourense que contan con obra súa e polo propio estudio do artista. «Eu xa levo tempo facendo en Lugo a ruta de arte polos murais da cidade e tiña claro que Ourense podía acoller algo semellante, por iso falei con Fabio Forino para organizalo. Foi unha xornada incrible, das mellores que temos feito. Participaron máis de oitenta persoas e foron dende Lugo os muralistas Diego As e Eusebio Nsue, e alí estivemos todos no seu taller. Haberá que darlle continuidade», sinala Guido Guía.

---

---

---