Uxía festexa con A Pedreira, Guadi Galego, Tanxugueiras e Budiño 40 anos nos palcos cun concerto en Santiago

20 horas • Auditorio de Galicia • 12 euros • Uxía comeza hoxe a soprar as candeas para conmemorar os 40 anos na música cun concerto especial en Santiago no que contará con Guadi Galego, A Pedreira, Tanxugueiras, Budiño, João Afonso, Javier Ruibal, Quim Farinhas e As Mosas (Chus e Ana Senlle, súas irmás), artistas que dun ou outro xeito tamén marcaron a súa traxectoria. «Nesta estrea quería que fose xente moi próxima a min, case case da familia», apuntaba Uxía na presentación deste concerto hai uns días.

Esta cita en Santiago será o punto de partida da xira «Será por flores» na que terán presenza tanto as composicións propias de Uxía como aquelas que a inspiraron. A artista revisará os seus traballos máis emblemáticos, desde «Enredadas» e «Mulleres a viva voz» ata as súas colaboracións con Narf ou Malvela. Tamén haberá tempo para a súa conexión con poetas como Novoneyra, Lorca e Rosalía de Castro e o seu traballo en Nunca Máis.

O escenario transformarase nun xardín de música e poesía para un espectáculo que evolucionará dende a intimidade ata o coral. A dirección musical estará a cargo de Pablo Novoa, que tamén formará parte da banda que acompañará a Uxía, ao igual que outros músicos cómplices ao longo da súa traxectoria como son Sérgio Tannus, Santi Cribeiro, Isaac Palacín e Pablo Novoa. As últimas entradas para o espectáculo aínda poden mercarse na web de Compostela Cultura e unha hora antes do evento no propio Auditorio.

---

---

---