O Céltiga persegue en San Lázaro o seu primeiro triunfo a domicilio a costa do Ciudad de Santiago
SANTIAGO CIUDAD
En partido adiantado da décima xornada de Liga, o Céltiga de Pablo Vázquez visita hoxe o estadio compostelán de San Lázaro. A partir das cinco da tarde, o cadro illense perseguirá o que sería o seu primeiro triunfo da tempada lonxe do Salvador Otero, onde tan só foi quen de sumar tres empates, máis unha derrota.
O Céltiga tentará impoñer o seu bo momento, tras tres xornadas sen coñecer a derrota, a un adversario que, pola contra, non vive precisamente a mellor etapa da súa historia. Descendido por vía administrativa da Segunda B afogado polos seus graves problemas económicos, o Ciudad apurou ao máximo os prazos para saír na Terceira. Ata o punto de que só deu xuntado un plantel para competir a escasas horas do inicio ligueiro.
Pragado de xogadores estranxeiros, na súa maioría procedentes do sur de América, o rival de turno do Céltiga semella estar pagando tanto a falta dunha pretempada como as dificultades derivadas disto á hora de acoplar un grupo humano descoñecido entre si ata a derradeira fin de semana de agosto.
Decimocuarto na clasificación con nove puntos, froito de dúas victorias, tres empates e catro derrotas, o Ciudad de Santiago mídese hoxe o cadro de Pablo Vázquez nun baixón de xogo, logo de perder tres dos seus catro últimos compromisos ligueiros. Dous deles, ante equipos do fondo da táboa como o Somozas, penúltimo clasificado, 0-2, e o Santa Comba, decimosexto da Terceira galega, que a pasada fin de semana superou o seu veciño por 3 goles a 1.
Pablo Vázquez non quería onte nembargante ningún tipo de confianzas. Porque pese a todos os condicionantes, «el Santa Comba cuenta con jugadores de calidad, y es un equipo agresivo». Por iso mesmo, o adestrador do Céltiga prevé «un partido de mucha pelea», e cun único precedente. O que rematou con empate sen goles na tempada 2007/08.
Nas filas arousás, Vázquez non sabía onte antes do derradeiro adestramento previo ao partido se podería contar por primeira vez cos 19 efectivos do seu plantel para confeccionar a convocatoria. Manuel e Óscar Río eran dúbidas, ao chegar á sesión de traballo con problemas musculares.