O programa de Envellecemento Activo organizou un encontro interxeracional no que os maiores compartiron as súas vivencias
27 mar 2025 . Actualizado a las 19:26 h.[S. G.] En Val do Dubra, as Feiras do Abril convertéronse nun encontro entre veciños, comercio, venda de gando e, como non, festa. Eran o ocio do momento, o tempo de mocear e bailar, pero tamén de aprender o bo facer dos proxenitores, que traballaban arreo para gañar catro pesos coa produción das colleitas, e co gando que levaban para vender.
Disto que deixou as feiras xorde un diálogo entre o pasado e o presente tecido con cantigas e lembranzas. Foi durante unha das tardes de Envellecemento Activo, cando tivo lugar unha xuntanza interxeracional onde os maiores do concello compartiron coas xeracións máis novas a memoria viva do que foron as feiras.
A conversa xirou arredor de recordos, historias e vivencias daqueles anos 70 e 80, tempos nos que as feiras eran o gran punto de encontro social e comercial. Manola de Parente (86 anos), Manolo Pachón (84 anos), Carmen do Curro (92 anos) e Lola da Rocha (95 anos) foron os fíos condutores desta viaxe ao pasado, relatando con detalle os costumes, os oficios e as tradicións que marcaban aqueles días.
Os máis novos, integrantes da Asociación Cultural Regueifa —Pedro Gándara Fraga (11 anos), María Gigirey Otero (14 anos) e Elena Noya Sesar (14 anos)— escoitaban atentos, absorbendo cada palabra e dándolle forma co seu propio imaxinario ao que eran as feiras. Pero as lembranzas non viñeron soas, viñeron con música. Carmen do Curro, entre conto e conto, levoulle a vida bailar… e bailou. Porque cando Manola evocou as cantigas da súa nai, o espírito da festa espertou por completo e comezou a cantar unhas coplas relacionadas co tema da conversa, xa que as feiras e Val do Dubra eran os protagonistas.
Desta experiencia nacerá un pequeno documental, que recolle esa viaxe emocional e que servirá de promoción para esta nova edición das Feiras do Abril. No vídeo, as ferreñas marcan o ritmo dunha historia que se repite e se renova, un recordo colectivo que resoa máis forte neste 2025 no que as Letras Galegas están dedicadas ás cantareiras.
Este pequeno vídeo servirá como homenaxe para todas esas cantareiras, moi presentes tamén neste encontro.
Unha xornada de Envellecemento Activo converteuse nun diálogo entre dúas xeracións.