A serie do verán emítese de martes a xoves no «prime-time» da TVG
16 jul 2024 . Actualizado a las 05:00 h.As tramas de Saudade de ti continúan aumentando a súa intensidade emocional. Repasamos en que punto están os seus personaxes principais e que podes agardar dos próximos episodios.
Recordos esquecidos
A terceira temporada de Saudade de ti deu comezo coa construción dun novo porto deportivo e as discrepancias que isto xeraba en Abrente. Algúns veciños víronse afectados polas obras, pero sen dúbida o peor parado foi Isidro. Unha parte da súa vivenda derrubouse con el dentro e desde o accidente permaneceu ingresado na UCI. O pai de Celia espertou do coma, pero sofre unha amnesia postraumática e non lembra nada desde que Olga, a súa defunta esposa, perdeu a vida nun accidente de tráfico. Para el, os dous últimos anos da súa vida nunca existiron. Esta situación supón un desafío emocional para toda a familia, pero sobre todo para Belén, a quen Isidro non lembra. ¿Logrará o pai de Celia recuperar a súa memoria e, con ela, a súa vida anterior?
Sen escrúpulos
Celia está preocupada pola saúde do seu pai e Pedro, o avogado, proponlle utilizar esta desgraza para conseguir o apoio da opinión pública para a súa causa. Celia vai rexeitar esta controvertida idea, porque a súa prioridade sempre foi o benestar do seu pai. Pero, ¿será este o final da colaboración entre Pedro Taboada e a doutora Eiroa?
Consellos interesados
Natalia, a filla de Óscar Osorio, chegou a Abrente acompañando ao seu pai e coa necesidade de seguir un proceso de rehabilitación que lle permitise recuperarse das consecuencias dun ictus, causado polo estrés laboral ao que se viu sometida. Isto permitiulle coñecer a Santi, quen foi o seu terapeuta, e hai pouco comezaron unha relación sentimental. Con todo, Celia advirte ao seu compañeiro no centro de saúde. Natalia podería estar a usalo para obter información. Santi dubida. ¿A doutora Eiroa dille isto para previlo ou porque sente algo por el e o seu incipiente noivado con Natalia fai que se poña celosa?
Relacións tensas
Despois da súa ruptura como parella, Brais confésalle a Noa que non pode continuar sendo o seu amigo. Segue estando namorado dela e deséxaa como noiva. A brutal honestidade do pequeno dos López de Castro marcará un punto de inflexión entrambos. Ademais, a súa amiga Álex mantén unha relación pouco recomendable con Eloi, o capataz da obra, cuxo comportamento comeza a levantar cada vez máis sospeitas.
Para toda a vida
Teresa segue adiante cos plans de voda da súa filla, pero Elba e Lucho enfróntanse aos seus propios dilemas. Mentres Lucho comeza a soñar con formar unha familia, Elba séntese angustiada polas expectativas do seu prometido. Este contraste obrígaos a responder unha pregunta crucial: ¿están realmente listos para dar o seguinte paso e converterse nun matrimonio?
Perdas económicas
Como directora de Porto de Abrente, Mónica teñen que afrontar unha grave crise debido ás consecuencias que ten para o seu negocio as obras que está a levar a cabo a construtora de Osorio. Mentres tanto, comproba con perplexidade que Adela mantén a súa ambigua relación con Óscar e se despreocupa das súas responsabilidades familiares. Mónica terá que enfrontarse a ambos e descubrirá que hai moito máis en xogo do que ela imaxinaba. ¿Poderá Mónica superar este obstáculo ou será o principio do fin para a súa empresa?