A folga de guionistas en Hollywood obriga a un parón na produción de series

Os guionistas de Hollywood levan tres semanas en folga, a primeira convocada na era do streaming. O pasado 1 de maio, ao non chegar a un acordo coa Alianza de Produtores de Cine e Televisión (AMPTP) para un novo convenio colectivo, o Sindicato de Guionistas (WGA) chamou os seus máis de dez mil membros a un paro indefinido. A falta dos escritores paralizou a industria de inmediato, e as súas primeiras consecuencias materializáronse nos programas en directo, os chamados late night. A súa produción baséase na actualidade, polo que non ter contidos pregravados significou non poder saír a antena na súa frecuencia diaria. Espazos como The Tonight Show Starring Jimmy Fallon, Jimmy Kimmel Live! ou Saturday Night Live perderon os seus característicos monólogos e, no seu lugar, encheron o espazo con programas repetidos.

Na mesma cadea, as seguintes afectadas son as series de televisión. Algúns dos grandes estudos, como Netflix, Disney, FX, HBO, Paramount, entre outros, tiveron que frear a produción como consecuencia da folga. Uns dos primeiros profesionais en tomar a decisión foron os irmáns Matt e Ross Duffer, escritores e creadores da popular Stranger Things. «A escritura non para cando comeza a rodaxe», escribiron na súa conta de Twitter. A quinta e última tempada da serie, que rematou de guionizarse antes de que se estrease a cuarta, atopábase en fase de filmación. «Agardamos que se chegue pronto a un acordo xusto para que todos poidamos volver ao traballo», sentenciaban.

The Last of Us, unha das ficcións máis afamadas da actualidade, detivo a fase de audicións da súa segunda tempada. Segundo Variety, comezará de novo unha vez «os escritores reciban un pago xusto». Relatan que, ao non ter guionistas, os directores probaban os actores con diálogos extraídos da segunda parte do videoxogo no que se basea. Da mesma maneira, Abbot Elementary, gañadora dun premio Emmy e dun Globo de Ouro, parou a escritura da súa terceira tempada. A guionista Brittani Nichols asegurou que a folga tamén podería influír no número de episodios que se publicasen nesta entrega.

A lista continúa con títulos como Cobra Kai, a serie de Netflix derivada da película dos anos oitenta Karate Kid; Severance, de Apple TV+; American Horror Story: Delicate, de FX, que ía contar coa participación de Kim Kardashian e Emma Roberts; e as terceiras tempadas de Yellowjackets, de Showtime, e de Hacks, de HBO, entre outras.

Que reclaman os escritores?

Como antecedente, a anterior folga de guionistas data de novembro de 2007 e durou cen días. Esta vez, o groso da protesta reside na compensación aos guionistas en materia de remuneracións e pagos remanentes, os chamados residuals que xorden cada vez que se emite unha serie na que os guionistas participasen. Tamén unha subida do salario mínimo dos profesionais por semana e asegurar que os soldos sexan apropiados.

---

---

---