Este luns á noite estréase «Os Amantes de Abrente», a historia que descobre a orixe da serie de éxito do pasado verán
11 jun 2023 . Actualizado a las 13:00 h.Saudade de ti, a serie producida por Voz Audiovisual, volve á grella da Televisión de Galicia o vindeiro domingo 18 coa estrea da súa segunda tempada. Antes, os espectadores teñen unha cita este luns á noite con Os Amantes de Abrente, un especial no que descubrir o que sucedía na vila antes do fatídico accidente co que deu comezo a serie.
Para todos os públicos
Para gozar de Os amantes de Abrente non é necesario saber nada de Saudade de ti, pero aqueles que seguiron a serie líder de audiencia durante o pasado verán descubrirán substanciosas referencias nesta precuela. Os acontecementos teñen lugar seis meses antes de que aconteza a traxedia que cambiará para sempre as vidas dos nosos veciños de Abrente. Os Eiroa e os López de Castro están celebrando xuntos e felices o aniversario de Celso, o pai de Gaspar e de Teresa. Mentres tanto, Isidro amósalle a Olga o terreo no que quere construír a casa dos seus soños, onde pensa envellecer xunto a súa esposa. Dúas estampas felices que axiña se converterán nun drama cando Celso morre e a Olga lle diagnostican unha enfermidade dexenerativa.
Catro historias de amor
A infidelidade despois dos 50 é a trama principal de Os amantes de Abrente, xa que Gaspar e a doutora Otero, unidos pola dor, comezarán un apaixonado romance ás agachadas de Isidro e Adela. Será posible manter en segredo este adulterio nunha vila tan pequena? Ao tempo que isto sucede, un novo enfermeiro chega a Abrente: Santi, que revoluciona o centro de saúde e a vida de Olga, que o ve como o mozo ideal para a súa filla. A doutora Otero sabe dos problemas que Celia está a ter en Bilbao e quere que volva a Abrente para poder ser feliz. Logrará Olga influír na súa filla para que regrese a casa?
Quen parece estar pensando en irse de Abrente é Mónica, xa que recibe unha oferta de traballo fóra da vila e cando comeza a analizar a súa situación persoal ve que Raúl carece de ambición profesional e ela vive atrapada na monotonía do seu matrimonio. A decisión parece tomada. Que podería reter a unha muller como Mónica en Abrente?
Por outra banda, Uxía e Lucho ultiman os preparativos da súa voda. Eles e os seus amigos están convidados a celebrar a despedida de solteiro, pero todo queda no aire cando se produce unha inesperada revelación: o prometido ten unha filla coa prima da noiva. Vai Uxía a cancelar a súa voda con Lucho por este motivo?
Líder de audiencia
A primeira temporada de Saudade de ti comezaba cun accidente de tráfico no que morrían Olga, a médica de Abrente, e Uxía, a súa sobriña. Isto provocaba o regreso á vila de Celia, que trataba de ocupar o baleiro que deixara súa nai tanto na familia como no centro de saúde. Ese foi o detonante das intrigas, segredos e romances que viviron os espectadores durante o pasado verán e que converteron esta ficción nun éxito.
Novos episodios
A partir do próximo domingo día 18 comezan a emitirse en horario de máxima audiencia os capítulos correspondentes á segunda temporada, onde as intrigas e o amor van estar máis vivos que nunca.
Raúl e a doutora Eiroa por fin están xuntos, pero Gaspar xa sembrou a dúbida de que el podería ser o pai de Celia, o que imposibilitaría o amor da parella, xa que serían irmáns.
Con ese escenario de fondo dará comezo a segunda tempada de Saudade de ti na que Raúl está decidido a pedirlle matrimonio a Celia, pero son moitos os obstáculos que a parella vai encontrar polo camiño. Haberá voda? Triunfará o amor?