«Queremos avanzar na Copa, para nós é a segunda prioridade tras Europa», dice el técnico del Porriño de cara a la Copa
12 mar 2025 . Actualizado a las 05:00 h.Isma Martínez González (Cangas, 1983) non renuncia á Copa. Ao contrario, o torneo é prioritario para un Porriño que xa pensa nas semifinais da EHF European Cup e que non poderá contar en Granollers con Daniela Moreno por unha rotura no bíceps femoral.
—Que sensacións ten para a Copa?
—Estamos ante unha das copas máis abertas dos últimos anos, porque as ausencias de Elxe e Málaga abren un pouco todo e coido que cada un ten as súas opcións; espero que nós tamén.
—Como ve a primeira eliminatoria ante o Elda?
—Complicada. É un rival que vai a máis coa chegada de José Ignacio Prades ao banquillo. Están competindo moi ben e veñen de gañar por seis goles a Bera-Bera. Vai ser unha eliminatoria moi dura na que temos que defender moi ben sobre todo e que se vai parecer pouco ao partido de liga que xogamos na nosa casa.
—A súa máxima preocupación éo cansazo pola tempada que levan enriba?
—O aspecto físico é a principal preocupación que temos dende o día que empezamos a adestrar. Nunha tempada con tantos partidos e sobre todo chegando a este final en todas as competicións, temos que manexar moi ben tanto a fatiga física como a mental. Mentalmente, temos que estar moi estables porque vai ser moi duro enlazar a Copa co partido do martes en liga en Elxe e a semifinal europea. Temos que estar moi centradas e serenas.
—Preocupa a peaxe que poidan pagar se avanzan na Copa?
—É que nós queremos avanzar na Copa. Podería pensarse que nos interesa quedar fóra cedo, pero para nada, o grupo quere chegar moi lonxe e logo xa valoraremos en liga que facer. Nas eliminatorias, a nosa intención é estar ben e pasar, e logo xa pensaremos como recuperar á xente. Esta Copa é importante, polo menos, queremos mellorar o do ano pasado e iso significa meterse en semifinais.
—Entón a Copa é prioritaria?
—Europa é prioritaria, a Copa é prioritaria nun segundo lugar e na liga, como temos play off, está nun chanzo por debaixo e xa nos preocuparemos dela.
—Ve factible unha final galega?
—Vexo posible unha final galega, imposible, dende logo, non é. Guardés ten un lado do cadro que non é fácil, pero non ten ningún dos favoritos. Ten dous partidos duros, pero é favorito e nós, se somos capaces de sacar o de Elda, temos ao Bera Bera, o equipo que ninguén quere.