Crujeiras tivo na casa o primeiro contacto co mundo do cabalo e hoxe en día é o organizador dunha das actividades ecuestres máis importantes da bisbarra
04 sep 2010 . Actualizado a las 02:00 h.Andrés Crujeiras Sampedro é un veciño de Carreira de 34 anos que leva coidando e montando cabalos dende que era un cativo. A día de hoxe, é organizador do Concurso Morfolóxico Cidade de Ribeira, unha das citas ecuestres máis importantes da Barbanza.
-¿De onde lle vén a súa afección polo mundo do cabalo?
-Na casa sempre tivemos cabalos, meu pai adorábaos. Dende pequenos, tanto os meus irmáns coma min, estivemos rodeados deles, así que só nos quedou a alternativa de que nos gustasen.
-¿Con cantos anos empezou a andar en cabalo?
-De moi pequeno, con apenas 7 anos.
-¿Cantos equinos ten?
-Entre toda a familia, teremos uns quince.
-¿De que raza son?
-A maioría deles son de pura raza española.
-¿Ser afeccionado aos cabalos é algo que sae caro?
-Si, moito. Hai que coidalos, telos saneados, alimentalos... e todo iso implica gastos. Ademais hai que ter en conta o custe do cabalo en si, aínda que isto depende da raza do animal.
-Dígame o rango de prezos que poden ter os cabalos de raza...
-É variable, pero de xeito estimado podo dicir que o máis barato pode valorarse en 3.000 euros e os máis caros poden chegar a valer 200.000 euros.
-¿Que é o que máis lle gusta de ter cabalos?
-Gústame ensinalos a comportarse nas competicións. É un pouco sentir o dominio sobre eles.
-¿Cantas horas lle dedica ao coidado dos cabalos á semana?
-Eu calculo que unhas quince. Tendo cabalos hai que atendelos a diario, non é calquera cousa.
-¿Prodúcelle a súa afección algún conflito familiar?
-Non, por sorte todos os que me rodean aman aos cabalos.
-¿Hai moitos afeccionados a este animal na comarca?
-Si hai bastantes. Penso que cada vez hai máis xente que se anima a ter cabalos, a pesar do sacrificio que isto supón.
-¿Cales son os principais campionatos ecuestres a nivel autonómico e nacional?
-En Galicia, sen dúbida, as citas de Silleda e Lugo. Esta última forma parte do campionato nacional. Xa a nivel nacional, hai que mencionar o Sicab, en Sevilla.
-¿E en Barbanza?
-En Couso temos o concurso morfolóxico, que penso que é o que atrae máis público, participantes e exemplares. Logo está o de Carballosa, que é o que lle fai un pouco de competencia ao Cidade de Ribeira. Por outra parte, en Boiro organízanse de vez en cando carreiras, pero iso é outra cousa.
-¿Pertence a algunha asociación?
-Si, formo parte da asociación Amigos dos Cabalos de Ribeira.
-¿Que me pode dicir como organizador da competición morfolóxica de Santa Uxía?
-Organizar todo isto é algo que leva moito traballo, pero ver o resultado final, é algo que me satisfai moito. Este ano intentamos ser un pouquiño máis ambiciosos e temos máis actividades, para que o público se anime a vir.
-¿Teñen algunha meta desde a organización do concurso?
-A curto prazo, tentamos que a xente coñeza esta competición, que se anime a vir e participar. Por outra parte, xa coa mirada posta a longo prazo, estamos facendo todo o posible para ir mellorando o Cidade de Ribeira. Queremos que a cita de Couso estea no campionato nacional. Ese é o obxectivo.