O bordo do peirao de Porto do Son, deseñado polos estudios galegos Creus e Carrasco e RVR Arquitectos, premio europeo do espazo público urbano 2024

O proxecto de mellora da praia e da reurbanización do bordo do peirao de Porto do Son, obra dos estudios galegos Creus e Carrasco (da Coruña) e RVR Arquitectos (de Santiago), recibiu o Premio Europeo do Espazo Público Urbano 2024 na modalidade de frontes marítimas, un galardón convocado polo Centro de Cultura Contemporánea de Barcelona (CCCB), nunha cerimonia celebrada este martes. Esta categoría incorporouse ao certame nesta edición (a número 12) para poñer en valor o papel das cidades costeiras fronte aos fenómenos climáticos extremos, e forma parte da Regata Cultural, programa de actividades impulsado polo Concello de Barcelona para acompañar a competición da Copa América de Vela.

O xurado internacional destacou a dobre finalidade da obra —promovida por Portos de Galicia, a Consellería do Mar e o Concello de Porto do Son— de «renaturalizar o paseo marítimo con dunas que protexen un parque existente, e reconstruír a relación entre as actividades portuarias e a comunidade local». O proxecto —subliña— resolve os problemas de convivencia habidos entre as actividades portuarias e urbanas, e favorece o contacto directo entre a vila e o mar. O xurado valora positivamente, neste senso, a atrevida e mesmo radical decisión do proxecto de preservar a antiga muralla que protexe a cidade dun mar especialmente axitado, situando as novas instalacións no reverso, que achegarán nova vida urbana a un lugar que antes estaba reservado exclusivamente ás instalacións portuarias, segundo lembra o Colexio Oficial de Arquitectos de Galicia.

Os membros do xurado aplaudiron o feito de que o proxecto demostre unha profunda comprensión dos problemas que aborda, como a necesidade de protexer e integrar a arquitectura e as defensas fronte ao mar; a urxencia de garantir o acceso á auga para toda a comunidade conectando ao máximo esta experiencia co tecido urbano; a dotación de infraestruturas que melloren o uso do paseo marítimo por parte dos peóns, e a importancia de salvagardar e restaurar os sistemas naturais nunha situación de urbanización e cambio climático. Así, considera que este enfoque se xestiona con honestidade, coidado e experiencia arquitectónica exhaustiva, dando como resultado un deseño que responde ás actividades urbanas e é respectuoso cos sistemas naturais.

Parque en Varsovia

Coa participación dun total de 297 proxectos, correspondentes a 35 países europeos, o xurado internacional concedeu o Premio Europeo do Espazo Público Urbano 2024 na categoría xeral ao parque no outeiro do Alzamento de Varsovia, obra dos estudios topoScape e Archigrest, que integra de forma anovadora a historia da zona —en Mokotów, un dos distritos máis céntricos— reciclando un montículo conformado como vertedoiro de entullo das ruínas da cidade tras a Segunda Guerra Mundial para crear un espazo público agradable que combina memoria, ocio e sensibilidade ecolóxica.

---

---

---