Os alumnos do Sofía Casanova logran a mellor fusión entre fotografía e matemáticas

Cun gran éxito de participación, o IES Sofía Casanova de Ferrol celebrou a finais do mes de maio o seu concurso de Fotografía Matemática. Na súa quinta edición, houbo premios para todos os niveis e con referencias matemáticas atopadas tanto na natureza como no propio urbanismo.

No caso dos alumnos de segundo de Bacharelato, os premios foron os seguintes. Miguel Trillo foi o gañador coa foto Ln que tomou directamente desde o coche. E os accésits foron para Antonio Rivero e Antón Iglesias. Estes tres alumnos xa participaron ademais noutras convocatorias deste concurso, que se leva celebrando desde que eles empezaron en primeiro da ESO. O certame só se suspendeu durante o curso de pandemia.

Segundo indican desde o propio instituto, nesta competición impulsada polas profesoras e profesores de Matemáticas, «de feito Antonio Rivero e Antón Iglesias foron gañadores en edicións anteriores, cando estaban na ESO».

As gañadoras da ESO

No nivel de terceiro e cuarto da ESO, resultou gañadora a alumna Inés Pérez (estudante de cuarto). A súa foto chamábase Infinito vexetal e amosaba precisamente as posibilidades (sen fin) das matemáticas na natureza. E a gañadora do nivel primeiro e segundo da ESO foi Uxía Iglesias, que é estudante de segundo e irmá de Antón Iglesias (accésit en Bacharelato). Concursou coa foto A cadros.

 Neste certame participaron alumnos e alumnas de todos os niveis.

---

---

---