Uxía Novoa, secretaria da asociación Polamiúda: «Este ano queremos denunciar a opresión da muller migrante»

Uxía Novoa López é a secretaria da asociación feminista chantadina Polamiúda, que foi creada no 2017. O colectivo convocou para este mércores unha concentración con motivo do 8M e prepara outras actividades para as próximas semanas.

—En que consisten os actos que teñen previstos para este mércores?

—Ás oito da tarde haberá unha manifestación que sairá da praza de Santa Ana e terminará na praza do Cantón coa lectura dun manifesto. No percorrido faremos paradas en determinados puntos, como na residencia de maiores, para dar visibilidade ao traballo das mulleres como coidadoras, que non se recoñece debidamente. Na manifestación cantaremos unha canción titulada Por ela vou, composta por Elena Fernández, que é unha integrante da nosa asociación, e tamén o Verdegaio lilás, que é unha versión da canción tradicional O verdegaio. Pero queremos sinalar que o 8M non é unha data de celebración, é un día de reivindicación e loita polos dereitos das mulleres.

—Neste 8M destacarán de forma especial algún dos problemas que afectan ás mulleres?

—Cada ano queremos centrarnos nun problemática determinada. O ano pasado incidimos nas dificultades con que se encontran as mulleres no mundo da administración. Este ano queremos centrarnos en denunciar a opresión e a discriminación que sofren as mulleres migrantes.

—Están preparando agora outras actividades?

—O día 18 organizaremos unha charla da profesora e activista Souadou Mohamed Fadel, que falará do papel das mulleres na loita pola liberdade do pobo saharauí. Será no auditorio municipal a partir das seis da tarde. Para o mes de maio preparamos outra actividade que aínda estamos perfilando e que unirá a música, a poesía e a cultura. Queremos potenciar as iniciativas deste tipo para acercar o feminismo a todas as esferas da sociedade, é dicir, pensamos que é importante promover accións de lecer e esparexemento que axuden a achegar o discurso feminista ás persoas máis reservadas e escépticas. Canta máis influencia teñamos na sociedade, máis posibilidades teremos de impulsar cambios sociais para que a situación das mulleres mellore. Temos previsto facer máis cousas ao longo do ano, pero aínda están sen concretar.

—Contan con algunha axuda oficial para financiar as súas iniciativas?

—Nos anos que leva funcionando a nosa asociación, contamos unicamente coas cotas das asociadas e cos cartos que obtermos na venda de pequenos produtos ilustrados cos nosos deseños. Organizamos actividades formativas, divulgativas e de concienciación, ademais de promover accións reivindicativas e de rúa. Creamos esta asociación no 2017 porque consideramos que era moi necesario que houbese un colectivo deste tipo na comarca de Chantada. Pensamos que durante este tempo a nosa asociación desenvolveu un labor importante e que tivo un efecto positivo, pero queremos organizar máis actividades e para iso necesitamos contar con máis fondos, porque nos nosos recursos son bastante limitados.

—Como pretenden aumentar os seus recursos?

—Acabamos de pór en marcha unha campaña de captación de fondos para que todas as persoas que o desexen poidan axudarnos con achegas económicas. Con este obxectivo creamos unha conta bancaria que se pode consultar no noso perfil de Facebook. Necesitamos axuda para organizar proxectos como o que temos previsto para maio.

—Colaboran con outras asociacións feministas?

—Formamos parte da plataforma Galegas 8M, que nos últimos anos organizou manifestacións conxuntas en varias localidades de Galicia, como Verín, Lugo e Vigo. Queremos tecer redes con outros colectivos feministas e gustaríanos estender as nosas actividades o máis posible, pero de momento centrámonos en Chantada porque somos unha asociación modesta. Somos unha vintena de socias activas, aínda que contamos con outras persoas que colaboran con nós de maneira ocasional.

O Día da Muller conmemórase con actos en dez municipios

Estes son os actos previstos para este mércores no sur da provincia con motivo do Día da Muller:

 A Pobra do Brollón. Ás 11.45 horas haberá unha concentración e a lectura dun manifesto diante da Casa do Concello. Ás 12.00 horas ofrecerase na Casa da Cultura o espectáculo «Maxia pola igualdade», a cargo do mago Leo Leíño.

 Monforte. Ás 12.00 horas, ante a casa consistorial haberá unha concentración coa lectura dun manifesto e un reparto de «plantas da igualdade». Ás 20.00 horas haberá na praza de España unha concentración organizada pola asociación Femforte.

 Chantada. As 12.00 horas ofrecerase na praza do Cantón o espectáculo «Acrobacias de muller», seguido da lectura dun manifesto. Ás 20.00 horas, Polamiúda organiza unha manifestación na praza de Santa Ana.

 O Saviñao. Ás doce do mediodía haberá unha concentración diante da casa consistorial.

 Ribas de Sil. Ás 13.30 horas, os alumnos do colexio público local lerán un manifesto e recibirán unhas chapas conmemorativas editadas polo Concello.

 Taboada. A asociación Landra organiza ás 20.30 un acto de homenaxe ás mulleres na Alameda.

 Quiroga. Na casa consistorial colocaranse lazos conmemorativos e o letreiro co nome do municipio —na entrada da localidade— será iluminado en malva.

 Sober. Na praza do Concello instalarase unha decoración con globos realizada por alumnos do colexio Virxe do Carme.

 Bóveda. No centro sociocultural instalarase bandeirolas contra a discriminación da muller no ámbito laboral.

 Folgoso do Courel. Na casa consistorial exporanse fotografías de mulleres do municipio cedidas por voluntarios.

---

---

---