Este domingo inaugurouse, por iniciativa particular, unha talla súa a tamaño real, froito do traballo de Juan Vila
23 jun 2024 . Actualizado a las 21:13 h.A Paco Pestana (Peredo, A Frairía, Castroverde, 1949) teríalle encantado a última actualización do seu espazo agro-pop. Quizais estaría algo abraiado ao mudar os papeis naturais e converterse el en fonte de inspiración en lugar de creador, para despois observar unha escultura súa a tamaño real. Este domingo inaugurouse unha figura en honor a Paco en O Forno de Catuxa, unha casa rural ás aforas de Lugo que ademais pronto abrirá as súas portas. Entre palabras, flores e apertas destapouse a talla nun acto en Carballido (Esperante, Lugo) ao que acudiron a súa viúva e o seu fillo, recoñecidas personalidades da vida social galega e, sobre todo, amigos de Pestana e de Marga Blanco, a artífice desta homenaxe que decidiu, a nivel particular, honrar ao seu benquerido amigo do xeito que a el máis lle tería gustado: cunha obra que desentrañase a súa personalidade e descansase no lugar no que finou e que tan feliz o viu. Polo momento cumpríronse máis de dous anos e medio do seu pasamento e a cidade de Lugo non ten ningún espazo público en honor a Pestana.
Pero agora, o artista multidisciplinar e recoñecido no mundo enteiro descansa no seu espazo agro-pop, xa que así bautizou el a finca sobre a que se pousa a talla de madeira froito do traballo de Juan Vila, que non perdeu detalle nin esqueceu os zapatos amarelos de Pestana nin tampouco o seu sombreiro. Tamén el, despois de Marga Blanco, tivo unhas sentidas palabras para o artista.
Paco quedaría asombrado do seu poder de convocatoria. Tanto é así que este domingo foron ducias as persoas que se pararon aos pés do Primitivo das Raposeiras, unha peza de madeira de gran tamaño que tamén descansa neste complexo particular situado aos pés da cidade amurallada e que foi ademais a última obra que fixo na súa vida.
Non faltou, aos arredores da escultura dedicada a Pestana, a súa inseparable bicicleta. Tampouco a bandeira galega pousada sobre os seus brazos, preto do corazón, nin o himno da terra, que soou grazas ás mans dun dos seus gaiteiros de Castroverde. Cun fondo de bosque infinito houbo bágoas da súa familia e da súa xente. Tamén moita música. Todo baixo un manto de cores vivas e intensas, que forman parte da marca Pestana, un home que viviu namorado do seu arredor e que sempre buscou nos demais a súa fonte de inspiración. Amor, liberdade, literatura e arte formaron parte da configuración persoal do artista de Castroverde. Ademais, el soubo mesturar coma ninguén o amor pola terra galega coas súas fantasías particulares, algo que transferiu tamén a este complexo de Carballido que agora é un museo ao aire libre do que gozar. Baixo o sol de xuño e sobre a impoñente eira, este domingo xuntáronse moitos sentimentos e lembranzas, das que Blanco non se esqueceu durante as palabras que deu a modo inaugural. Dixo que a pegada de Paco era fonda e recordou como o artista xogaba coa idea de ver O Forno de Catuxa rehabilitado, mais tan seguro non imaxinou o lonxe que ían chegar os seus desexos. Soñaba cun espazo aberto, alternativo, cheo tamén desa excentricidade da que nunca se separou. E así foi. Así é. Materializáronse os soños despois de moito traballo e esforzo por parte de Marga e do seu compañeiro de vida, que non dubidaron en traballar arreo para facer unha inauguración por todo o alto e fixar para sempre as pegadas de Pestana.
Agora o legado de Paco inundou esta parroquia de Lugo e non haberá día no que as súas obras, moitas inéditas, non sexan fondo de reunións de amigos, días de traballo no campo ou paseos dos visitantes que está a punto de recibir O Forno de Catuxa.
