Rodrigo Cuevas, premiu de les Músiques Actuales: «Esto te fai siguir na llucha pola oficialidá del asturianu»
COLES
L'artista destaca que les llingües españoles en xeneral tan «mui maltrataes»
09 oct 2023 . Actualizado a las 17:32 h.El cantante Rodrigo Cuevas recibió con «muncha emoción» el Premiu de les Músiques Actuales 2023 y celebró que sía una reconocencia a la diversidá y un impulsu a la defensa del asturianu que realiza al traviés de la so propuesta musical.
«Esto te fai siguir na llucha pola oficialidá del asturianu», apuntó l'artista en declaraciones a Europa Press, nes qu'aseguró que nun sabe entá qué va facer colos 30.000 euros colos que ta dotáu'l gallardón qu'otorga'l Ministeriu de Cultura y Deporte.
Cuevas refirióse al premiu como una reconocencia a les llingües españoles que tán «mui maltrataes». «Ye un apoyu grande pal asturianu», precisó, pa llamentar que nel Principáu lleven esperando un procesu d'oficialidá del asturianu dende hai 40 años. «Nun acaba de llegar nunca», criticó.
Coles mesmes, l'artista destaca que'l premiu recueye'l so compromisu cola diversidá. «La maraviya del llugar onde vivimos ye la diversidá y la variedá que tenemos. El que la odia, odia al so país», sentenció, informa Europa Press.