O Intecmar foi escenario da reunión nacional de laboratorios de biotoxinas mariñas

O Instituto Tecnolóxico para o Control do Medio Mariño de Galicia (Intecmar) acolleu a décima Reunión da Rede Nacional de Laboratorios Oficiais de Biotoxinas Mariñas, que congregou nas instalacións do laboratorio nacional de referencia de Vilaxoán a representantes de sete das oito institucións que conforman esta malla no conxunto de España. Con motivo da xuntanza, o conselleiro do Mar, Alfonso Villares, visitou o centro, onde puxo en valor «o liderado do Intecmar que sitúa a Galicia á vangarda europea avalando a seguridade do consumo dos produtos pesqueiros da comunidade».

O conselleiro explicou que Galicia conta cunha ampla rede de puntos de toma de mostras no seu litoral; unha rede que fai posible ofrecer un alto nivel de eficiencia na resposta ao sector marisqueiro e bateeiro pola necesidade de trasladar información de forma rápida e efectiva sobre as incidencias de peches e aperturas das zonas produtivas.

A actividade de control do centro concrétase cada ano na realización dunhas 90.000 análises, das que 10.000 son referidas a biotoxinas; a emisión de máis de 600 informes do estado das zonas e a aprobación de ao redor de 400 resolucións que regulan a actividade extractiva das áreas onde se producen moluscos bivalvos na comunidade.

---

---

---