María Emilia Casas, doutora «honoris causa» pola Universidade de Vigo: «Foi clave para ampliar a igualdade no noso país»

A primeira muller en presidir oTribunal Constitucional, María Emilia Casas Baamonde, foi investida esta mañá como doutora honoris causa pola Universidade de Vigo. A xurista natural de León, cuxos pais son de Monforte de Lemos, recibe por terceira vez unha condecoración deste tipo e convértese na primeira muller xurista en incoporarse ao claustro de doutores honoris causa da institución viguesa. Na súa traxectoria destacan premios de gran relevancia, entre os que se atopa o Premio Fernández-Latorre no ano 2017.

Casas Baamonde foi a primeira catedrática de Dereito do Traballo e Seguridade Social de España. No ano 1998 ingresou no Tribunal Constitucional, sendo o membro máis novo na historia da institución, e desde o 2004 ata o 2010 foi a primeira muller en presidir o Alto Tribunal.

Durante a cerimonia celebrada na facultade de Ciencias Económicas e Empresariais do campus vigués, Jaime Cabeza Pereiro, tamén catedrático de Dereito do Traballo e da Seguridade Social, exerceu como padriño. No seu discurso houbo espazo non só para o ensalzamento da carreira laboral da doutora, senón tamén para reivindicar o seu papel como impulsora de medidas que loitan contra as diferenzas e a discriminación de xénero. «Ingresa neste claustro alguén que testemuña o dereito fundamental e os principios de igualdade e non discriminación por enriba de todo», sinalou Cabeza. Este deixou un recado para a súa propia universidade: «Aínda non chegou o tempo de ter a primeira reitora e é un reto inaprazable para a nosa institución».

María Emilia Casas, que fixo un pequeno repaso sobre a súa carreira xudicial e académica, falou no súa intervención das circunstancias sociais, políticas e xudiciais nas que se atopa a Unión Europea. Na súa alegación, dedicada ao traballo e aos dereitos, sobre todo o do acceso á información tecnolóxica, centrou a súa atención na necesidade que ten a Unión Europa de propiciar cambios radicais no mercado que permitan competir con Estados Unidos e China. Ademais, na parte máis xurídica e reflexiva do seu discurso non se esqueceu de lembrar que este doctoramiento «marca un fito moi importante, inesquecible, na miña vida».

O acto durou case dúas horas e estivo presidido polo reitor da Universidade de Vigo, Manuel Reigosa, que foi o encargado de abrir e pechar a cerimonia. Tras pedir á catedrática que recitase o seu xuramento e entregarlle o colar e as luvas brancas, exclusivos dos doutores e símbolo de pureza, comezou a súa intervención nomeando o famoso discurso de Martin Luther King sobre a liberdade, a xustiza e a igualdade: «Non se pode soñar cun mundo mellor sen ter en consideración o afán de xustiza e igualdade». Reigosa fixo especial hincapé no papel de Casas Baamonde á hora de romper teitos de cristal: «Foi clave para ampliar a igualdade non noso país». E non se olvidou tampouco do que supuxo que fora a primeira presidenta do Tribunal Constitucional. «A súa excelencia académica permitiulle presidilo».

Con respecto á loita pola igualdade, o reitor deixou claro que «aínda queda moito por facer» e que a doutora se une a unha institución que está comprometida coa consecución da equidade entre homes e mulleres.

Ao acto non só acudiron académicos galegos, senón que tamén viaxaron ata Vigo representantes e compañeiros das universidades ás que a xurista estivo ligada durante todo estes anos, como a Complutense de Madrid, a de León e a de Valladolid. A cerimonia contou coa intervención, ata en tres ocasiones, do coro sénior do campus de Vigo que amenizou a gala.

---

---

---